De ielstikel (krabbescheer).
De ielstikel groeit ûnder en heal boppe it wetter. De lange smelle blêden sitte yn in rozet om in koart staltsje. Oan de kant fan de blêden sitte lytse skerpe puntsjes.
Yn juli/augustus komme der wite blomkes mei 3 bledsjes oan. It útweidzjen giet liek as by de ierdbei: der komme útrinders oan en oan de ein komt dan in nij plantsje.
Yn de hjerst sakket er nei ûnderen en yn de maitiid makket er wer nije blêden en dan komt er wer nei boppe. De âlde blêden fergeane en foarmje mei oare planten it leechfean.
It is in plant fan puollen, petgatten en ek yn sleatten komt er foar. Froeger wie it yn ús omkriten in algemiene plant. Mar nei de sechstiger jierren binne de oantallen hurd achterút gien.
De blaustirns (zwarte stern) makke faak syn nêst op de ielstikels. Der wiene puollen wêr 't hûnderten blaustirnsen bretten. It liket wol dat de ielstikel wer wat foarút giet. Miskien komme der dan ek wer mear blaustirnsen.
Oeds Hoekstra, Burgum.
foto links: de ielstikel. foto: Hendrik van Kampen.
