Lyts hoefblêd (Klein hoefblad).
It Lyts hoefblêd is in plantsje mei in prachtich moai giel blomke. It liket hast wol in lyts Hynsteblomke. Beide hearre by de famylje fan de Kompositen.
It is ien fan de earste bloeiers yn'e maitiid. De bloeitiid is fan febrewaris oant april. It is ek ien fan'e planten dy't al bloeie foardat de blêden te foarskyn komme.
De blomkes binne opboud út sa'n tweintich oant tritich buiskeblomkes yn't midden en
dêr omhinne in pear hundert straalblomkes (lintblomkes). De blomstâle hat gjin blêden, mar puntige giel-griene skobben.
As de blomkes útbloeid binne en sied sette, búge de blomstâlen en hingje de kopkes
nei ûnderen, se wurde dan minder gau wiet. As de siedsjes ryp binne geane de stâlen
wer rjochtoerein stean en kinne de ripe siedsjes mei de plúskes fuortwaaie.
As se goed teplak komme, ûntkymje se. De grutte massa komt fansels net goed teplak en
wurdt wei.
As de siedsjes fuortwaaid binne ferwylje de blomstâlen. De blêden kinne at se folwoek-
sen binne wol tsien oant tweintich sintimeter breed wurde. De ûnderkant is wyt-eftich
en wat filtich.
Yn'e grûn fine wy in woartelstôk, dat is eins in ûndergrûnse stâle dy't altyd mar fierder groeit en útrinners fan wol mear as in meter makket. As ûnkrûd yn'e bougrûn is er min fuort te krijen; elk lyts stikje fan de woartelstôk begjint wer op'e nij te groeien.
It Lyts hoefblêd is in echte pionier. It begjint faak te groeien op grûn dy't iepen is. Bygelyks yn nije berms, nij oanmakke grûn (polders), op plakken wêr't yn'e grûn omskuord is.
Al mei al is it in besûnder plantsje dat algemien foarkomt. Men soe sizze kinne: It is in boadskipper fan'e maitiid.
Oeds Hoekstra, Burgum.
