De Tieneblom (Wilgeroosje).
Wat hat de tieneblom no mei de wylg te meitsjen?
Sa 't wy witte komme de tienen fan de wylch. De tienen binne de jonge bûchsume takjes fan de wylgen. De tienen waarden en wurde noch wol brûkt om dingen by elkoar te binen en ek om kuorren en platbinnen te flechtsjen.
De tieneblom hat lykas in protte soarten wylgen ek fan dy smelle “wylgeblêdsjes”. Ek hat er opfallende blommen, hiel lange smelle trossen binne it. Moaie roze-reade blommen.
Fandêr de namme wilgeroosje / tieneblom.
Yn de nijste flora's wurdt er no knikkend wilgeroosje neamd. De tieneblom is in algemiene plant dy't oeral yn de kâlde en gematichde streken fan it noardlik healrûn foarkomt.
De hichte fan de folgroeide plant kin mear as oardeheale meter wurde. De blomtrossen begjinne fan ûnderen ôf nei boppe ta te bloeien. De blomkes hawwe fjouwer blêdsjes. Tusken de twa ûnderste blêdsjes is in rûmte oerbleaun krekt as of dêr noch plak foar in fiifde blêdsje is.
Op keale plakken yn bosken (troch kappen of brân) komt er massaal foar, ek lâns boskpaden en yn rûchten is er te finen. De grutte trossen blommen meitsje in hiel protte siedsjes, dy't troch de wyn ferspraat wurde.
Ien grutte plant kin wol hunderttûzen siedsjes produsearje.
Oeds Hoekstra, Burgum.
