It reid 3 (het riet).
Dizze kear woe ik it ris ha oer inkele fûgels yn en by it reid. Earst mar ris oer in pear fûgels dy 't skea dwaan kinne oan it reid.
Yn 'e tijd as de protters (spreeuwen) yn grutte swermen troch de loft saaie en wy ús ferwûnderje dat se sa goed byelkoar bliuwe yn al dy swaaien dy 't se yn 'e loft meitsje; dan sliepe se ek byelkoar en dat dogge se faak yn it reid.
Jo kinne begripe dat de reiden dan 'plat slept' wurde. Minder bekend is dat ek swellen, ierd- en boerenswellen (oever- en boerenzwaluwen) yn it reid oernachtsje.
Skiere guozzen (grauwe ganzen) frette en fertraapje it reid en markols (meerkoeten) frette wol oan de jonge spruten. De blaumieskes (pimpelmezen) beitelje mei har lytse snaffeltsjes de âlde reiden iepen as se op 'e sneup binne nei larven fan ynsekten.
No komme wy ta oan de echte reidfûgels. Wy begjinne mar mei de reiddomp (roerdomp). Dy bliuwt hast syn hiele libben yn it reid. Men sjocht him mar komselden fleanen.
Frâl yn it deade reid hat er in hiel goede skutkleur; by gefaar giet er dan yn 'e pealhâlding stean. Tusken de reiden, op 'e grûn makket er syn nêst. Sa 'n nêst makket de brune hoarnskrobber (bruine kiekendief) ek, mar dan wat grutter en rûger.
De brune hoarnskrobber siket syn proai faak fier bûten de reidfjilden.
De karrekyt (kleine karekiet) makket syn nêst fêst oan 'e reidstâlen, sa 'n heale meter oant in meter heech. Mei it groeien fan it reid giet it nêst mei omheech. De reidlyster (grote karekiet) is yn Fryslân tige seldsum wurden.
Men seit wol dat it komt troch de droechte yn Afrika, wêr 't se oerwinterje en dat troch de droechte net oerlibje. De snilekrûper (snor) en it burdmantsje (baardmannetje) meitsje har nêst folle leger, flak boppe it wetter of de grûn.
Se binne net algemien, mar dochs yn ús omkriten wol te hearren of te sjen.
De reidsjonger (rietzanger) en de reidmosk (rietgors) binne folle algemiener. Dizze beide fûgels binne faak yn 'e reiden, mar meitsje har nêst yn 'e rûchten by it reid of yn 'e sompen.
Yn en by it reid is oan fûgels altiden wer hiel wat te belibjen.
Oeds Hoekstra, Burgum.
foto links: reiddomp yn it reid. foto: Ronald van Wijk.
