De barchjeblom (gele lis).
De barchjeblom is in algemiene plant dy't te finen is oan 'e wetterkant of yn 'e sompen. In algemiene plant hat faak mear as ien namme.
Sa ek mei de barchjeblom dy't ek neamd wurdt: bargeblom, earrebarreblom, earrebarresnilen, oaievaarsblom, eibertsblom, flodermûtsen ensf. It is in nijsgjirige blom en it besjen wol wurdich.
De blom hat trije grutte giele blomblêden mei donkere strepen der op (paadwizers nei de hunig). Dêr tusken steane 3 smelle giele blêdsjes.
Oan 'e boppekant binne noch 3 giele blêdsjes te sjen; dat binne 3 blêdsjes fan 'e stamper.
Oan 'e underkant fan dizze blêdsjes sit in lyts lipke wêr 't it blommemoal (stuifmeel) op komme moet. Hoe 't dat bart is op 'e tekening wol te sjen.
As it insekt fierder krûpt om by de hunig te kommen, kriget er wer nije blommemoal op 'e rêch, dat is dan wer bestimd foar in oare barchjeblom. Ut de fruchtknop (vruchtbeginsel) groeit de frucht. Dat is in lang trijehoekich gefal.
As men dêr 4 lytse prikjes ûnder yn stekt liket it wol in lyts brachje. Fandêr de namme fan dizze plant. Op it lêst barste de sieddoazen iepen, en de siedsjes falle dan faak yn it wetter.
Dêr driuwe se dan wiken op en mei de wyn of de streaming komme se sa op oare plakken telâne.
Oeds Hoekstra, Burgum.
