Hopwynsels of hop (hop).
De hop hat hiel lange stâlen dy 't om takken en beammen slingerje. It is de langste slinger- of wynselplant in ús lân.
It slingerjen sit al yn'e jonge stâlen, dy draaie faak earst om elkoar hinne en as se dan in takke of beam fine (fral elzen en wylgen), dan slingerje se dêr omhinne. Se draaie altyd deselde kant om, altyd mei de klok mei.
De stâlen fiele wreed oan, it fielt hast wat kleverig. Dat komt omdat der hiel lytse skerpe hierkes oan sitte. Dêrtroch kinne se har goed fêstsette.
De bleden binne oan'e boppekant ek wreed; se binne meastal wat ynsnien en sa ûntsteane dan 3 of 5 lobben.
De plant is twahuzich ; dat wol sizze dat der planten binne mei manlike blomkes (as dy útbloeid binne falle se ôf) en planten mei froulike blomkes en dat wurde de moaie hopbellen.
De hopwynsel wurde ek kweekt, no yn Nederlân eins net mear, mar yn it bûtenlân noch wol. Alline de froulike plant wurdt kweekt om de hopbellen. De bittere stof ût'e klieren fan de hopbellen wurdt brûkt bij de produksje fan bier.
Deselde stof wurdt ek brûkt as genêsmiddel foar de mage en as kalmearringsmiddel. De famylje wêr 't de Hop bij heart hat mar twa soarten. De oare soarte is de Himp (hennep). De Hop en de Himp heare by de himpfamylje (hennepfamilie).
Oeds Hoekstra, Burgum.
