Spjochten op de Haeyehoek
As jo mei Piter van de Galiën prate dan duorret it trochgeans net lang of it giet oer de natoer.
Sa ek de lêste kear dat ik Piter trof en hy belangstellend ynformearre hoe oft it mei ús Campbell fokkerije gie. Suver oandien moast ik meidiele dat ik ôfskie naam ha fan myn lêste Campbell einen dy’t oernaam binne troch de ferneamde fokker A. Haakma. Dizze fokker hat in goede reputaasje en de Cambell populaasje sil dan ek seker wol oerlibje.
Mar bûten de Cambells binne der mear ynteressante fûgels op de Haeyehoek. Al trije jier wennet er in spjochtenechtpear by ús ûnder de pannen. Prachtige fûgels en yn dit gefal ek hiel bysûnder om’t se al trije jier efterinoar in jong spjochtegesintsje grutbrocht hawwe ûnder it pannendak. Se hawwe jierren lyn in moai rûn gatsje hammere yn in net al te bêste boeiplank en sieten doe yn de tempex dakplaat. Dizze plaat waard wol 30 sintimeter djip útholle en trije jier lyn besletten sy dat it wol in gaadlik plakje wie om lytse spjochtsjes út te brieden.
Folle wurk fan it brieden sille se net hân ha want sa’n tempex plaat is lekker waarm. Dit jier ha wy it hûs wat opknapt mar doe’t ik it lege spjochtenestje folpurje soe waard it my dochs te machtich. Sa’n moai ûnderkommen koe ik net samar fernietigje en wy hawwe besletten dat salang dit spjochte-echtpear gebrûk makket fan dizze lokaasje, ik dit gedielte fan it hûs yn âlde steat hâlde mei. (skilt ek moai wat wurk). Myn hoop is dan ek dat der noch in soad jonge spjochtsjes berne wurde mei ûnder ús dak.
Berend Visser
foto links: jonge spjochten.
